Давид Наваро, Фудбалски Бизнис Менаџер, Villarreal CF

• Villarreal Academy е препознатлива како силна референца во развојот на млади играчи. Можете ли накратко да ја објасните филозофијата зад академијата и што ја прави нејзината методологија единствена?

Филозофијата на Villarreal Academy во однос на развојот на играчите се темели на тоа играчот да биде поставен во центарот на сите едукативни и развојни процеси. Нашата тренинг-методологија е креирана така што одговара на индивидуалните потреби на секој играч. Верувам дека токму овој пристап, заедно со принципот секогаш да се работи со јасно поставени цели и со посебно внимание на поврзаноста меѓу тренинзите и натпреварите, е тоа што нè издвојува кога станува збор за развој на играчи.

• Денес, развојот на младите оди многу подалеку од фудбалските вештини. Како Villarreal Academy прави баланс помеѓу техничкиот, тактичкиот и физичкиот тренинг и едукацијата, вредностите и личниот развој?

За нас е од суштинско значење сите наши играчи да се воспитуваат и развиваат во согласност со нашите вредности. Во таа насока, секогаш зборуваме за концептот на „играч како личност“, каде што техничките и тактичките способности се подеднакво важни како и тоа да се биде добар човек надвор од фудбалскиот терен. Затоа, не се фокусираме само на активности поврзани со фудбалскиот тренинг, туку и на активности кои ги зајакнуваат и промовираат личните вредности на секој играч.

• Какви можности отвора членството во мрежата на Villarreal Academy за младите играчи, тренерите и целокупниот фудбалски екосистем во партнерските земји?

Главната можност, без сомнение, е шансата да се учи и развива според методологијата на Villarreal CF, под водство на високо квалификувани професионалци кои имаат создадено играчи на највисоко ниво. Дополнително, преку Villarreal Academy, играчите добиваат можност да доживеат уникатни и богати искуства во светот на фудбалот.

• Која порака би сакале да ја испратите до младите фудбалери и семејствата во Македонија кои го започнуваат својот пат во рамки на проектот Villarreal Academy?

Би сакал да им порачам дека тренираат според методологијата на една од најдобрите академии во светот и дека треба максимално да ја искористат таа можност преку напорна работа и континуитет, но пред сè – уживајќи во секој момент. Не ветуваме дека сите играчи ќе станат професионалци, но ветуваме дека ќе учат и дека ќе направиме сè што е во наша моќ за да им помогнеме да го достигнат највисокото ниво до кое можат да стигнат.

Брендон Парамо, Менаџер за интернационален бизнис, Villarreal CF

• Проектот Villarreal Academy активно се шири на меѓународно ниво. Која е главната цел на оваа глобална експанзија и како меѓународните академии се вклопуваат во долгорочната визија на клубот?

Главната цел на меѓународната експанзија на Villarreal Academy е проширување на методологијата, вредностите и моделот за развој на играчи на клубот надвор од Шпанија, како и создавање одржлив глобален екосистем поврзан со Villarreal CF. Меѓународните академии ни овозможуваат да идентификуваме, развиваме и инспирираме играчи ширум светот, а воедно да го зајакнеме брендот на клубот, навивачката база и долгорочните односи со семејствата, тренерите и партнерите.

• При изборот на партнерски академии низ светот, кои клучни вредности и стандарди ги бара Villarreal со цел да се обезбеди конзистентност и квалитет во развојот на играчите?

При изборот на меѓународни партнери, приоритет им даваме на заедничките вредности и долгорочните цели, а не на краткорочните резултати. Фокусот е на развојот на играчот како поединец, образовните вредности, почитта на и надвор од теренот, како и силната поврзаност со локалната заедница.

• Villarreal Masters Academy во Македонија е дел од оваа меѓународна мрежа. Што претставува ова партнерство за Villarreal Academy и какви се вашите очекувања за развојот на проектот во овој регион?

Македонија има силна фудбалска култура. Нашите очекувања се да изградиме долгорочен и одржлив проект фокусиран на едукација на тренерите, развој на играчите и постепен раст. Целта ни е да создадеме можности за локалните играчи да стекнат искуства со Villarreal во Шпанија, како и да ја поддржиме структурата и видливоста на академијата во регионот.

• За крај, која порака би сакале да ја упатите до младите фудбалери и семејствата во Македонија кои го започнуваат својот пат во рамки на проектот Villarreal Academy?

Ги охрабруваме играчите да се фокусираат на секојдневното подобрување и да уживаат во процесот. Да се биде дел од Villarreal Academy значи да се биде дел од една глобална фудбалска фамилија и со нетрпение очекуваме да се запознаеме со нив и во Шпанија и во Македонија.